Top News – Raketa që mund të godasin edhe Rusinë/ SHBA, 2 miliardë USD ndihma ushtarake për Ukrainën

Shtetet e Bashkuara të Amerikës po përgatisin më shumë se 2 miliardë dollarë ndihmë ushtarake për Ukrainën, e cila për herë të parë pritet të përfshijë raketa me rreze më të gjatë veprimi, si dhe municione dhe armë të tjera, i thanë agjencisë së lajmeve Reuters dy zyrtarë amerikanë të informuar për këtë çështje. Ndihma pritet të shpallet brenda kësaj jave dhe do të përfshijë pajisje mbështetëse për sistemet e mbrojtjes ajrore Patriot dhe armë antitank Javelin, thanë zyrtarët. Në total, Shtetet e Bashkuara kanë ndarë mbi 27 miliardë dollarë si ndihmë për Ukrainën, që kur Moska ka nisur luftën në shkurt të vitit të kaluar. Aleatët perëndimorë kanë ofruar po ashtu armë në vlerë të miliarda dollarëve për Ukrainën. Së fundmi, Ukrainës i janë premtuar edhe tanket gjermane Leopard dhe ato amerikane Abrams, por që për të mbërritur deri në fushëbetejë do të duhen edhe disa javë. Ukraina ka lëshuar alarmin duke thënë se Rusia po përgatitet për një ofensivë të re, të madhe, që mund të fillojë në përvjetorin e parë të luftës, në fund të këtij muaji, ndaj edhe ka kërkuar nga perëndimi më shumë fuqi zjarri, përfshirë madje edhe avionët ushtarakë.