Udhëheqësi i Koresë së Veriut Kim Jong Un mbikëqyri lëshimin e raketave lundruese strategjike me rreze të gjatë veprimi të dielën, duke konfirmuar integritetin e fuqisë bërthamore të vendit dhe gatishmërinë për kundërsulm përballë kërcënimeve të sigurisë, tha të hënën media shtetërore KCNA. Lëshimi është ngjarja më e fundit në të cilën mori pjesë Kim Jong un, në një mori aktivitetesh të udhëheqësit të Koresë së Veriut, për të nënvizuar progresin ushtarak dhe ekonomik para një kongresi të partisë që pritet të mbahet në fillim të vitit 2026. Kim shprehu "kënaqësi të madhe" ndërsa raketat lundruese fluturuan përgjatë orbitës së tyre mbi detin në perëndim të Gadishullit Korean dhe goditën objektivin e tyre, tha KCNA. Kim tha se "kontrolli i besueshmërisë dhe reagimit të shpejtë të komponentëve të pengesës bërthamore të Koresë së Veriut në mënyrë të rregullt, është thjesht një ushtrim i përgjegjshëm", pasi vendi "po përballet me kërcënime të ndryshme sigurie". Kim Jong un pohoi se Koreja e Veriut do të vazhdojë t'i kushtojë të gjitha përpjekjet e saj zhvillimit "të pakufizuar" të forcës së saj luftarake bërthamore, tha KCNA. Lëshimi i së dielës vjen pas raportit të KCNA javën e kaluar se Kim kishte parë nga afër punën për ndërtimin e një nëndetëseje me energji bërthamore me vajzën e tij, një pasardhëse e mundshme, dhe kishte mbikëqyrur testimin e raketave tokë-ajër me rreze të gjatë veprimi. Koreja e Veriut mund të kryejë teste shtesë raketash rreth Ditës së Vitit të Ri, tha agjencia koreanojugore e lajmeve Yonhap, duke cituar një zyrtar ushtarak të vendit.