Viti 2024 ka nisur me nota alarmi...Thuajse dy vite pas pushtimit rus të Ukrainës dhe me lindjen e mesme në prag të humnerës, kërcënimi i një lufte më të gjerë shfaqet në horizont. Kryeministra, sekretarë mbrojtjeje dhe shefa ushtarakë paralajmërojnë se kërcënimi i një konflikti të gjerë është më i madh tani se kurrë më parë. Qeveritë evropiane, njëra pas tjetrës, kanë lëshuar paralajmërime për qytetarët e tyre që të fillojnë të përgatiten për luftë. Dhe tani, vendet e natos po nisin një nga stërvitjet më të mëdha në histori, me 90 mijhë trupa nga cdo cep i kontinentit dhe nga SHBA që pritet të nisin lojërat herkuliane të luftës, një përpjekje kjo për të demonstruar fuqinë ushtarake para Vladimir Putinit dhe cdo kërcënimi tjetër të mundshëm. E gjithë kjo vjen ndërsa admirali Rob Bauer, president i komitetit ushtarak të NATO-s, i kërkoi qeverive të përgatiten për një ndryshim radikal duke parashikuar një konflikt të madh të armatosur brenda 20 viteve të ardhshme. Gjenerali tashmë në pension, Kevin Ryan, thotë se në 2024 shpenzimet ruse të mbrojtjes do të rriten në 140 miliardë dollarë, ose një e treta e buxhetit të vendit. Dhe ky ndryshim nuk ka kuptim nëse ka në fokus vetëm kundërshtarin aktual, Ukrainën, një vend me një popullatë sa një e treta e rusisë. Ndryshimi merr kuptim nëse rusia po përgatitet për një luftë kundër një armiku të madh, sic është NATO.