Një raketë është gati të godasë Hënën, por askush nuk do të dëgjohet të thotë këtë herë: "Hjuston, kemi një problem". Në fakt, lajmi se një copë e Falcon 9 të SpaceX është gati të përplaset me sipërfaqen e satelitit tonë është pritur me gëzim nga pjesa më e madhe e komunitetit shkencor, i cili mezi pret orën 8:35 të mëngjesit të 5 gushtit për të studjuar se çfarë do të ndodhë në momentin e përplasjes. Studiuesit janë përgatitur për të parë se cfarë ndodh pas një ngjarjeje të tillë në sipërfaqen e Hënës, të mbushur me kratere. Shumë astronomë kanë kryer tashmë studime të mbushura me hipoteza që mund të marrin tani konfirmim ose të hidhen poshtë. Ndërsa është e vërtetë që meteorët shpesh përplasen me Hënën, është shumë e vështirë për shkencëtarët që të hartojnë trajektoret e tyre dhe të studiojnë pasojat e përplasjeve. Me një raketë si ajo e SpaceX ky problem nuk ekziston pasi të gjitha të dhënat e nevojshme për të llogaritur sjelljen e saj në orbitë, ekzistojnë tashmë. Në fakt, nuk ështe e gjithë raketa Falcon 9 që do të përplaset në hënë, por vetëm pjesa e saj që është e projektuar për të mos u kthyer më në bazë. Në thelb, bëhet fjalë për një raketë rreth 12 metra të lartë dhe që peshon rreth 4 ton. Duke ditur datën e nisjes, madhësinë, masën dhe orbitat që ndoqi, një ekip kërkimor ishte në gjendje të llogariste datën dhe kohën pothuajse të saktë të rënies të mbeturinave hapësinore pranë Kraterit Ajnshtajn në Hënë. Raketa do të arrijë një shpejtësi prej rreth 8,750 kilometrash në orë përpara se të shkatërrohet në sipërfaqe. Ky është momenti që ndez imagjinatën dhe interesin e të gjithë komunitetit astrologjik. Raketa sidoqoftë, nuk ishte projektuar për të arritur në Hënë; në fakt ajo duhej të vetëshkatërrohej në hapësirë. Megjithatë, ajo do të jetë në gjendje të ofrojë edhe një shërbim të fundit për shkencën dhe studiuesit e hapësirës.