Lëvizja Huthi e mbështetur nga Irani pretendon se ka goditur me raketë një anije mallrash në pronësi britanike dhe ka rrëzuar një dron amerikan në detin e kuq. Ekuipazhi i anijes Rubymar u detyrua të braktiste mjetin pasi u vu nën sulm pranë brigjeve të jemenit. Një zëdhënës i Huthit lexoi një deklaratë ku thuhej se anija ishte goditur me raketa të fuqishme dhe tani po rrezikon mbytjen. “Trupat detare të forcave të armatosura të jemenit kryen një operacion specifik ushtarak duke marrë në shënjestër anijen britanike Rubymar me një numër raketash detare. Si rezultat i dëmeve të pësuara, anija rrezikon tani mbytjen”. Një deklaratë nga operacionet e tregtisë detare të britanisë së madhe, nënvizonte se zyrtarët kishin marrë një raport për një incident në detin e kuq. Autoritetet ushtarake kanë bërë të ditur ndërkohë se ekuipazhi ka braktisur anijen. Ndërkohë, zëdhënësi i Huthit tha edhe se rebelët kanë rrëzuar një dron amerikan MQ-9 Reaper, mbi al Hudaydah. “Me ndihmën e zotit, forca jonë ajrore rrëzoi një dron amerikan, dhe e bëri këtë me një raketë të përshtatshme. Droni ishte në mision armiqësor kundër vendit tonë, për llogari të një entiteti armik”, tha zëdhënësi. Kjo vjen në mesin e tensioneve në rritje në detin e kuq ndërsa huthit e mbështetur nga Irani po kryejnë sulme të përsëritura me dronë dhe raketa mbi anijet e lidhura me izraelin. Sulmet e mëparshme, kanë dëmtuar ndjeshëm tregtinë detare pasi kanë marrë në shënjestër trajektoret e lundrimit nga ku kalon 15 për qind e trafikut detar të botës.