Gjobat ndaj shkelësve të kodit rrugor apo edhe pezullimet e lejeve të drejtimit, po kapin nivele rekord e megjithatë numri i aksidenteve dhe pakujdesive në rrugë vijon të jetë i lartë. Bilanci javor i policisë rrugore të Elbasanit, pasqyron kontrolle të shtuara dhe intensive, duke futur në përdorim edhe radarët dhe dragerat për të bërë të mundur evidentimin e personave që paraqesin rrezikshmëri në rrugë. Një shtetas ka rënë në prangat e policisë së Elbasanit dhe është shoqëruar për në komisariat, ndërkohë janë procesuar penalisht shtatë të tjerë për vepra të ndryshme penale duke filluar nga “Drejtimi i automjeteve në mënyrë të parregullt” e deri tek “Shkelja e rregullave të qarkullimit rrugor”. Dhjetra leje drejtimi janë pezulluar nga efektivët kryesisht për drejtim mjeti nën efektin e alkoolit. Në total janë shënuar plot 971 masa administrative në Elbasan, në harkun kohor të vetëm një jave. Pjesa më e madhe e masave administrative u caktuan për shkak të mosvendosjes së rripit të sigurimit gjatë qarkullimit me autmjet apo edhe mungesa e pajisjes me kaskë mbrojtëse gjatë lëvizjes në akset rrugore.