Një sulm me dron ukrainas shkaktoi një zjarr të madh në një rafineri ruse nafte në qytetin Tuapse të martën, thanë zyrtarët, në sulmin e tretë në portin në Detin e Zi në më pak se dy javë. Ushtria e Ukrainës konfirmoi se kishte kryer sulmin, i fundit në një seri të intensifikuar sulmesh të dizajnuara për të goditur industrinë e naftës të Rusisë dhe për të ulur të ardhurat që ndihmojnë Moskën të financojë luftën në Ukrainë. Imazhet në mediat sociale treguan tym të zi të dendur që ngrihej nga rafineria. Zyrtarët i kërkuan njerëzve të qëndronin brenda dhe të mbanin dritaret mbyllur. Pas një sulmi më herët mbi rafineri, shi i zi ra mbi qytet, duke lënë pas mbetje vajore. Rafineria ndaloi prodhimin më 16 prill për shkak të dëmtimit nga dronët në port që e bëri të pamundur transportimin e prodhimit të saj, thanë burime të industrisë për Reuters. Të paktën tre persona janë vrarë në sulme, sipas zyrtarëve, dhe në një prej goditjeve pati edhe derdhje nafte në det. Tuapse është në të njëjtën kohë një vend turistik, me plazhe të frekuentuara nga shumë pushues. Zyrtarët rajnalë urdhëruan të martën njerëzit që jetonin pranë rafinerisë të evakuoheshin dhe të vendoseshin përkohësisht në një shkollë lokale.