Tirana po përballet me një rritje të ndjeshme të kostos së jetesës, ku çmimet po rriten shumë më shpejt se të ardhurat e shumicës së qytetarëve. Sipas të dhënave të platformës Numbeo, qiratë dhe një pjesë e mirë e produkteve bazë janë shtrenjtuar ndjeshëm gjatë pesë viteve të fundit, konkretisht pas pandemisë, duke e bërë jetesën në kryeqytet gjithnjë e më të vështirë për familjet dhe të rinjtë. Një nga goditjet më të mëdha vjen nga tregu i qirave. Sipas statistikave, qiraja mesatare për një apartament 1+1 në qendër të Tiranës është rritur nga rreth 41 mijë lekë në vitin 2021 në mbi 66 mijë lekë në vitin 2026, ose afro 59% më shumë. Kjo rritje konsiderohet shumë më e lartë se ritmi i shtimit të pagave në të njëjtën periudhë.