Shtetet e Bashkuara njoftuan planet për një "Gazë të Re" të rindërtuar nga e para që do të përfshijë ndërtesa të larta banimi, qendra të dhënash dhe resorte bregdetare, pjesë e përpjekjes së Presidentit Donald Trump për të çuar përpara një armëpushim Izrael-Hamas të tronditur nga shkeljet e përsëritura. Trump themeloi një ditë më parë Bordin e Paqes që u konceptua fillimisht si një iniciativë për Gazën e pasluftës por që më pas u zgjerua për të përfshirë në listën e objektivave zgjidhjen e konflikteve globale. Pasi vendosi firmën në dokumentin e themelimit të bordit, në davos të Zvicrës, trump ftoi dhëndrin e tij Jared Kushner të paraqiste planet e zhvillimit për Gazën që është shndërruar në rrënoja nga dy vjet luftë. "Në fillim, ne po luanim me ndërtimin e një zone të lirë dhe pastaj po mendonim të kishim një zonë të Hamasit", i tha Kushner një audience në Davos për planet e hershme të Trump për të rindërtuar Gazën, ku pothuajse e gjithë popullsia prej 2 milionë banorësh është e zhvendosur brenda vendit. "Dhe pastaj thamë, e dini çfarë? Le të planifikojmë një sukses katastrofik". Kushner i paraqiti audiencës një prezantim me diapozitiva që përshkruante një "master-plan" për atë që ai e quajti një "Gazë të Re", të shfaqur në një hartë me ngjyra, me zona të rezervuara për banim, qendra të dhënash dhe parqe industriale.