Të paktën pesë protestues u qëlluan për vdekje nga policia në Kenia dhe një pjesë e parlamentit u përfshi nga flakët ndërsa demonstratat kundër rritjes së taksave u përshkallëzuan të martën. Turma e zemëruar e njerëzve të revoltuar çau kordonet e policisë dhe mësyu parlamentin në kryeqytetin Nairobi përpara se t'i vinte flakën një pjese të tij. Në një fjalim të martën në mbrëmje, presidenti Uilliam Ruto tha se do të përdoren të gjitha mjetet për të "parandaluar çdo përpjekje të kriminelëve të rrezikshëm për të minuar sigurinë dhe stabilitetin e vendit". Pas deklaratës, ai urdhëroi daljen e ushtrisë në rrugë. Protestat kundër një projektligji jopopullor të financave, i cili përfshin disa rritje taksash, kanë vazhduar prej ditësh. Por ato u përshkallëzuan të martën pasi deputetët miratuan ndryshimet. Protestuesit hynë në parlament, duke shkatërrua pjesë të brendshme të tij dhe duke i vënë flakën pjesëve të kompleksit.