Krerët e koalicionit qeverisës gjerman, SPD, Të Gjelbrit dhe liberalët diskutojnë sot për një paketë të tretë masash lehtësuese pas rritjes së ndjeshme të çmimeve. Diskutimet pritet të përfundojnë me masa konkrete në ndihmë të qytetarëve pas rritjes së ndjeshme të çmimeve të energjisë dhe artikujve ushqimorë. Në konsultime merr pjesë kancelari Olaf Scholz si edhe liderët e të gjelbërve dhe liberalëv. Bisedimet zhvillohen për ndihma të fokusuara tek pensionistët dhe studentët, ulje tatimesh dhe një rregullore pasuese për biletën 9 euro që ishte në fuqi në tre muajt e fundit. Sipas Sekretarit të Përgjithshëm të SPD-së, Lars Klingbeil qeveria duhet të ndihmojë aty ku duhet. "Ne duhet t'u ndihmojmë atyre që janë në nevojë ekzistenciale.", tha Klingbeil për "Süddeutsche Zeitung". Që do të thotë, që ata fitojnë mirë mund t'i përballojnë kostot. Socialdemokrati e quajti gabim që pensionistët nuk u përfshinë në 300 eurot e ndihmës së përgjithshme për energjinë që qeveria jep prej shtatorit për të punësuarit. Ministrja e Familjes, Lisa Paus tha për gazetae gjermane "Rheinische Post", se familjet vuajnë më shumë nga çmimet e larta. "Prandaj duhet të rritet ndjeshëm kuota për fëmijët dhe të paktën të kompensohet inflacioni." Të Gjelbrit duan futjen e një bilete 29 euro për trafikun rajonal dhe një 49 euro për levizje në të gjithë vendin. E Majta kërkon vendosjen e një çmimi kufi për energjinë. Kurse shoqatat sociale kërkojnë lehtësime të tjera si psh rritja e limitit jetësor me 200 euro dhe zgjerimi i numrit të personave që kanë të drejtë të marrin ndihmë për strehim nga 600.000 vetë në 2-3 milionë vetë.