“Shoqëritë Audituese” private janë të organizuara në formën ligjore të një shoqërie aksionare apo shoqërie me përgjegjësi të kufizuar, të cilat kanë si subjekt veprimi auditimin ligjor. Certifikimi i këtyre audituesve kryhet nga Autoriteti i Certifikimit, pasi kandidatët kanë kryer tre vite stazh profesonal pranë një eksperti kontabël. Autoriteti i Certifikimit i cili licenson audituesit privatë është në varësi të Ministrisë së Financave. Ky autoritet përbëhet nga pesë anëtarë të cilët emërohen për një periudhë tre vjeçare sipas propozimeve të Ministrisë së Ekonomisë. Që të çertifikohen audituesit privatë testohen me provimin e aftësive profesionale të kandidatëve, pranë Bordit të Mbikëqyrjes Publike. Bordi i Mbikëqyrjes publike është organ kolegjial, i përbërë nga shtatë anëtarë, të emëruar gjithashtu nga Ministri i Financave me një mandat 4-vjeçar, me të drejtë rizgjedhjeje jo më shumë se dy herë radhazi.