Kandidati për kancelar i unionit CDU/CSU, Friedrich Merz, dëshiron të formojë qeverinë e re federale gjermane sa më shpejt që të mundet. "Tani jemi më pak se tetë javë para Pashkëve dhe mendoj se kjo kohë duhet të jetë e mjaftueshme për të formuar qeverinë në Gjermani," tha ai në Berlin. Gjermania ka që prej muajit nëntor që drejtohet nga një qeveri pa shumicë parlamentare, tha Merz, duke iu referuar shpërbërjes së koalicionit qeveritar të udhëhequr nga Scholz. "Ky është një ngërç nga i cili duhet të dalim dhe shpresa ime është që ne ta bëjmë këtë sa më shpejt”. Por kancelari i deritanishëm, Olaf Scholz ka bërë të qartë tashmë se nuk dëshiron të jetë pjesë e një qeverie federale të udhëhequr nga CDU/CSU. Po ashtu ai tha se nuk do të jetë as pjesë e grupit negociator të bisedimeve për koalicionin. "Nëse do të ketë ka bisedime, mes SPD dhe Unionit, unë nuk do të jem negociator i SPD-së," tha Scholz. Ai tha se kishte kandiduar për postin e kancelarit federal dhe se nuk dëshiron të marrë ndonjë post si përfaqësues i SPD-së në një qeveri federale të udhëhequr nga CDU”. Sa më shpejt që të krijohet qeveria e re, aq më mirë është. Ekonomia gjermane ka kaluar dy vjet radhazi në recesion. Shumë votues presin, gjithashtu, që rregullat e imigracionit të shtrëngohen, sidomos pas disa sulmeve vdekjeprurëse në muajt e fundit, për të cilat janë fajësuar imigrantët. Por, sfida më e madhe e menjëhershme do të jetë qasja ndaj administratës së re të SHBA-së, si dhe të sigurohet që Evropa e ka fjalën e saj në çdo marrëveshje të mundshme të bërë mes SHBA-së dhe Rusisë për Ukrainën.