Presidenti Donald Trump bëri një dalje të rrallë në Zyrën Ovale, me këshilltarin e tij më të fuqishëm, Elon Musk, në krah, para se të nënshkruante një urdhër ekzekutiv për të vazhduar zvogëlimin e përmasave të qeverisë federale. Agjencia e lajmeve Associated Press ka mundur të sigurojë një dokument të Shtëpisë së Bardhë që synon të çojë përpara punën e Elon Musk për uljen e shpenzimeve qeveritare përmes Departamentit të Efikasitetit të Qeverisë. Musk tha se në qeverinë federale ka disa punonjës të mirë, por ata duhet të mbajnë përgjegjësi për punën që bëjnë, ndërsa e quajti burokracinë federale, degë të katërt të pushtetit të “pazgjedhur me votë”. Kjo është hera e parë që Musk flet para gazetarëve që kur iu bashkua administratës së Presidentit Trump si një punonjës i posaçëm me ndikim të gjerë mbi agjencitë federale. Ai është gjithashtu individi më i pasur në botë dhe pronar i platformës sociale X. Musk është kritikuar për një fuqi të tepruar dhe pa mbikqyrje. Por pavarësisht shqetësimeve për transparencën e munguar, Musk tha se ai është një libër i hapur. Në dokumentin e Shtëpisë së Bardhë thuhet se “agjencitë do të ndërmarrin plane për reduktimin e punonjësve federalë në shkallë të gjerë dhe do të përcaktojnë se cilët përbërës të agjencisë (ose edhe vetë agjencitë) mund të eliminohen ose bashkohen për shkak se funksionet e tyre nuk kërkohen nga ligji”. Dokumenti gjithashtu thotë se agjencitë duhet të “punësojnë jo më shumë se një punonjës për çdo katër që largohen nga qeveria federale”. Përjashtime ka në rastet kur bëhet fjalë për imigracionin, zbatimin e ligjit dhe sigurinë publike. Presidenti Trump dhe Elon Musk po u kërkojnë punonjësve federalë të japin dorëheqjen në këmbim të stimujve financiarë, ndonëse plani i tyre është i ngrirë për momentin ndërkohë që një gjykatës shqyrton ligjshmërinë e tij. Në bazë të planit, punonjësit që japin dorëheqjen do të paguhen deri më 30 shtator. Zyrtarë të administratës thanë se më shumë se 65,000 punonjës e kanë pranuar ofertën.