Mëngjesin e së premtes është përmirësuar situata me zjarret në vend, megjithëse raportohen 11 vatra aktive. Ndër vatrat kryesore mbetet ajo në Dajt të Tiranës, mbi tunelet e Qafë-Mollës. Ministria e Mbrojtjes njofton se nuk ka rrezik për zonat e banuara. Edhe në Priskë e Madhe ku zjarri vijon prej ditësh, nuk raportohet rrezik për banesat. Në Gurë-Lurë, Dibër vijon nga operacionet më të rëndësishme në luftën kundër flakëve, ku janë angazhuar qindra forca, të ndihmuar edhe nga vullnetarë. Aktualisht është vendosur nën kontroll perimetri pranë banesave dhe është evituar rreziku për djegien e tyre. Nga ajri kanë operuar 2 avionë Air Tractor, ndërsa puna vijon në dy drejtimet e tjera ku zjarri ruan intensitet.Edhe në zonën Qafa e Helmes, Bulqizë vatra vijon aktive në terren pyjor. Në Trojë, Mirditë është një vatër aktive zjarri dhe po punohet për shuarjen e saj. Ndonëse janë drejt izolimit dhe nuk ka rrezik për banesat, në Shkodër vijojnë aktive vatrat në Rrencë dhe Goraj-Budishtë.