Autoriteti Kombëtar Hapësinor i Kinës, publikoi sot imazhet e marra nga kamerat e roverit Zhurong, të cilat tregonin pajisjet për shmangien e pengesave dhe panelet diellore në automjet, si dhe strukturën e sipërfaqes së Marsit. "Njerëz të internetit, ja ku janë imazhet e Marsit që mezi keni pritur." tha agjencia në një postim në rrjetet sociale. Roveri Zhurong zbarkoi në sipërfaqen marsiane të shtunën, duke shënuar uljen e parë të suksesshme nga ndonjë vend, që në misionin e parë në Mars. Zhurong, i quajtur kështu sipas një perëndie kineze të zjarrit, mbërriti disa muaj pas zbarkimit të fundit të Shteteve të Bashkuara në Mars - Perseverance - dhe është festuar në Kinë si një moment historik në ngjitjen e saj në statusin e superfuqisë hapësinore. Ulja e roverit ishte një shqetësim i madh për inxhinierët kinezë të hapësirës, me mediat shtetërore që përshkruanin procesin e përdorimit të një parashute për të ngadalësuar zbritjen dhe këmbët me ventuza si "pjesa më sfiduese e misionit". Ai do të kalojë rreth tre muaj atje duke bërë fotografi dhe duke marrë të dhëna të ndryshme. Kina ka përparuar shumë në garën e saj me Shtetet e Bashkuara dhe Rusinë, astronautët dhe kozmonautët e të cilave kanë përvojë dekada në eksplorimin e hapësirës. Ajo lëshoi me sukses në prill, modulin e parë të stacionit të saj të ri hapësinor, me shpresën që të dërgojë edhe një ekuipazh deri në vitin 2022 dhe eventualisht të dërgojë njerëz në Hënë.