Breshëri me kokrra sa një top golfi ka vrarë qindra pëllumba në Spanjë, ndërsa turistët janë paralajmëruar të qëndrojnë brenda mes një stuhie të egër. Një rrebesh shiu përfshiu Tarragonën, duke shkaktuar dëmtim të ndërtesave, kaos në udhëtime dhe përmbytje. Pamjet e frikshme nga qyteti i bregdetit lindor tregonin një burrë që u rrëmbye nga një rrjedhë uji. Një tjetër video tregonte një pjesë të çatisë së një qendre tregtare që binte në tokë. Moti ekstrem vrau qindra pëllumba në Portin e Tarragonës dhe videot e publikuara në rrjet tregonin shpendët e pajetë në tokë, pas rrebeshit. “Zogjtë nuk kishin kohë të mbroheshin dhe ishin viktima të stuhisë së dhunshme që goditi zonën”, thotë një banor. Më shumë se 1 mijë telefonata për ndihmë u regjistruan në departamentin e zjarrfikësve ndërsa moti i keq shkaktoi kaos në të gjithë bregdetin dhe la shumë banorë pa energji elektrike. Zjarrfikësit ndihmuan me nxjerrjen e njerëzve nga bodrumet e përmbytura dhe largimin e pemëve të rrëzuara, disa prej të cilave kishin shtypur makina. Të paktën tre persona raportohet se janë plagosur dhe janë dërguar me urgjencë në spital për shkak të stuhisë.