Në shtetet e bashkuara të amerikës, një grua ka përdorur pistoletën e saj për të vrarë një burrë, që nga makina e tij kishte filluar të qëllonte me një pushkë gjysmëautomatike mbi turmën në një festë në rrugë dhe që mund të kishte kryer një masakër të radhës. Ngjarja ka ndodhur në Charleston të Virxhinias Perëndimore. Gruaja, ishte mes pjesmarrësve në një festë ditëlindjeje, e zotëronte rregullisht armën. Episodi ka ndodhur në mesin e polemikave për nevojën e kufizimit të lirisë së armëve, e parashikuar në kushtetutën amerikane, që është rindezur pas masakrës në shkollën fillore të Uvaldes, në Teksas. Denis Butler, një 37 vjecari me precedentë penalë, i ishte kërkuar të largohej dhe të mos e parkonte makinën në zonën ku po zhvillohej festa. Sipas policisë lokale, ai ishte kthyer menjëherë më pas, i armatosur me një pushkë gjysmë automatike, dhe kishte filluar të qëllonte kundër turmës, ku ishin të shumtë edhe fëmijët. Gruaja, emri i të cilës nuk është bërë i ditur dhe që nuk kishte eksperienca në forcat e rendit, në vend që të tentonte të fshihej, ka nxjerrë armën e saj dhe ka qëlluar kundër agresorit, duke e vrarë.