Ka zgjatur vetëm disa orë arratia e 18-vjeçarit Kledi Çyrbja, I cili plagosi me armë zjarri këtë të shtunë në Shijak një 30-vjeçar. Çyrbja u largua me shpejtësi pasi plagosi me armë zjarri pistoletë shtetasin Saimir Bega, i cili ndodhet jashtë rrezikut për jetën, por Policia arriti ta kapte pas disa orësh kërkim. Konflikti ka ndodhur për motive të dobëta, ku pas një konflikti verbal, 18-vjeçari ka nxjerrë armën e ka qëlluar në drejtim të 30-vjeçarit. Shërbimet e Policisë, sapo kanë marrë njoftim, kanë shkuar menjëherë në vendngjarje dhe falë veprimeve të shpejta kanë identifikuar autorin dhe arritën ta arrestonin. Grupi hetimor vijon punën për zbardhjen dhe dokumentimin e plotë të rrethanave të ngjarjes. Materialet I kaluan prokurorisë për veprime të mëtejshme, teksa 18-vjeçari do të përballet me veprën penale plagosja dhe armëmbajtje pa leje.