Një avion luftarak amerikan është rrëzuar mbi Detin e Kuq në një incident të dukshëm të "zjarrit mik", tha ushtria amerikane. Të dy pjesëtarët e ekuipazhit të avionit F/A-18 Hornet, të marinës amerikane, u hodhën në mënyrë të sigurt, me njërin prej tyre që ka pësuar lëndime të lehta, konfirmoi Komanda Qendrore. Incidenti erdhi pasi Shtetet e Bashkuara kryen një seri sulmesh ajrore kundër një depoje raketash dhe objekteve komanduese në kryeqytetin e Jemenit, Sanaa, të operuara nga militantët Houthi të mbështetur nga Irani. Komanda Qendrore amerikane shtoi se goditi gjithashtu shumë dronë të lëvizjes Houthi dhe një raketë lundrimi që ishte lëshuar kundër anijeve mbi Detin e Kuq. Në një deklaratë, Komanda Qendrore e SHBA-së konfirmoi një incident "zjarri mik" mbi Detin e Kuq. “Kryqëzori USS Gettysburg, i armatosur me raketa, që është pjesë e grupit të goditjes së transportuesit USS Harry S Truman, gabimisht qëlloi dhe goditi një avion F/A-18, i cili ishte ngritur në fluturim nga USS Harry S Truman”, thuhet në deklaratë. Nuk është e qartë nëse avioni i rrëzuar ka qenë i përfshirë në operacionin në Jemen. Më herët Komanda Qendrore tha se sulmet kundër objektivave në Sanaa kishin për qëllim "të prishnin dhe degradonin operacionet e lëvizjes Houthi, si sulmet kundër anijeve luftarake të marinës amerikane dhe anijeve tregtare në Detin e Kuq Jugor, Bab al-Mandeb dhe Gjirin e Adenit".