Ukraina ka ndryshuar prej më shumë se një jave strategjinë e saj ushtarake në mbrojtjen kundër pushtimit rus. Ekspertët thonë se kishte ardhur koha për ta bërë këtë pasi lufta nuk mund të vazhdonte si më parë. Xhen Spindel, pedagoge në universitetin amerikan të Nju Hempshajërit, thotë e vendi, nuk ka personel dhe armë të mjaftueshme për të vazhduar luftën rraskapitëse. Sipas saj, lufta në Ukrainë duhet të bëhet më "asimetrike" e kjo do të thotë që ushtria ukrainase të mos përballet drejtpërdrejt me ushtrinë ruse, e cila është superiore në shumë aspekte, në fushë të hapur, por të përdorë taktika që janë më të përshtatshme për përmasat e trupave dhe armatimin e ushtrisë ukrainase. Kjo është pikërisht ajo që duket se po ndodh në Kursk. "Ukraina tregoi se territori rus nuk është më i paprekshëm dhe se Ukraina po e sulmon atë për të larguar vëmendjen e forcave ruse nga bombardimi dhe shkatërrimi i Ukrainës”, thotë Spindel.