Në kulmin e tensionit lidhur me Ukrainën, lidhur edhe me shqetësimin e Perëndimit nga ndërhyrja e ushtrisë ruse në vendin fqinj, Rusia ka njoftuar për një manovër ushtarake në shkallë të gjerë në Atlantik, Arktik, Paqësor dhe Mesdhe. Në stërvitjen e planifikuar për në janar dhe shkurt janë përfshirë gjithsej më shumë se 140 anije, mbi 60 aeroplanë dhe 1000 pajisje të tjera ushtarake, njoftoi Ministria ruse e Mbrojtjes në Moskë, sipas të dhënave të agjencive ruse të lajmeve. Rreth 10.000 ushtarë do të marrin pjesë në këtë manovër. Ministria ruse e Mbrojtjes shpjegoi, se qëllimi kryesor i stërvitjes së planifikuar është "mbrojtja e interesave kombëtare ruse në oqeane dhe për t'u bërë ballë kërcënimeve ndaj Rusisë prej oqeaneve". Ndërkohë, SHBA ka lejuar vendet baltike të furnizojnë Ukrainën me armët e prodhuara në Amerikë. Departamenti i shtetit njoftoi, se Estonia, Letonia dhe Lituania si dhe Britania e Madhe kanë marrë lejen që nga arsenalet e tyre të dërgojnë në Ukrainë pajisje ushtarake të prodhimuara në SHBA, por nuk janë dhënë detaje për llojin e armëve. Burimet thonë se në këtë mënyrë Estonia lejohet të furnizojë Ukrainën me raketa Javelin dhe Lituania me raketa Stinger. Ministri i Mbrojtjes i Lituanisë, Arvydas Anusauskas, i konfirmoi agjencisë së lajmeve AFP furnizimet e planifikuara me armë për në Ukrainë. "Ne kemi vendosur të dërgojmë armë dhe të tjera ndihma, por nuk mund të përmend detaje", deklaroi ai.