Presidenti rus Vladimir Putin ka pak mundësi të mira në Ukrainë, me forcat e tij të armatosura që janë të paafta për të përparuar ndjeshëm në fushën e betejës, ndërsa sanksionet perëndimore po ia pakësojnë burimet, tha shefi i inteligjencës së jashtme të Estonisë. Kaupo Rosin, një spiun i lartë në krahun lindor të NATO-s, i tha Reuters se Rusia po humbiste më shumë njerëz sesa po rekrutonte në vitin e pestë të luftës së saj dhe se një mobilizim i përgjithshëm do të ishte thellësisht jopopullor dhe potencialisht do të dëmtonte stabilitetin. "Të gjithë këta faktorë së bashku po krijojnë një situatë ku disa njerëz në Rusi, përfshirë nivelet më të larta, e kuptojnë se kanë një problem të madh. Është e vështirë të thuhet se çfarë mendon Putini për këtë, por mendoj se të gjithë këta faktorë po fillojnë të ndikojnë në vendimmarrjen e tij", tha ai në një intervistë. Forcat ruse në muajt e fundit kanë regjistruar disa nga ritmet e tyre më të ngadalta të përparimit në Ukrainë që nga viti 2023. Ekonomia e Rusisë prej 3 trilion dollarësh u tkurr ndërkohë me 0.3% në tremujorin e parë. Putin thotë se masat qeveritare për të nxitur ekonominë po fillojnë të japin rezultate pozitive dhe ka përsëritur vazhdimisht se forcat ruse do të luftojnë derisa të arrijnë të gjitha qëllimet e tyre. Rosin thotë se arsyeja kryesore pse situata financiare në Rusi është "kaq e keqe" janë sanksionet mbi sektorin financiar që po "dëmtojnë vërtet shumë", ndërsa masat ndëshkuese mbi eksportet e naftës së Rusisë po kufizojnë gjithashtu të ardhurat e saj. "Mendoj se kanë përpara zgjedhje shumë të vështira tani. Është e vështirë të parashikohet se çfarë do të vendosin në këtë situatë", thotë ai. Estonia, e cila ndan një kufi tokësor me Rusinë, është një mbështetëse kryesore e Ukrainës në aleancën ushtarake të NATO-s dhe Bashkimin Evropian dhe u ka bërë thirrje vazhdimisht aleatëve të saj të rrisin presionin mbi Moskën.