Presidenti rus Vladimir Putin dhe Presidenti kinez Xi Jinping u takuan në kuadër të një forumi për sigurinë dhe mbrojtjen në Euroazi, që Moska dhe Pekini e shohin si një mjet për t’iu kundërvënë ndikimit të Perëndimit. Presidenti Putin tha gjatë takimit se dy shtetet veprojnë në bazë të interesave të tyre dhe ato nuk janë të drejtuara kundër ndonjë shteti tjetër. “Bashkëpunimi ynë nuk është i orientuar kundër askujt. Ne nuk krijojmë blloqe apo aleanca, ne vetëm veprojmë në bazë të interesave të popujve tanë,” deklaroi Putin në fillim të takimit dypalësh me Presidentin kinez, Xi. Në komentet e tij Presidenti Xi theksoi se Kina dhe Rusia duhet “të ruajnë synimin origjinal për një miqësi brezash” përballë “një situate ndërkombëtare që ndryshon vazhdimisht”. Dy presidentët folën nga Astana e Kazakistanit ku po mban punimet forumi i themeluar që në vitin 2001 dhe ku janë anëtare fuqitë kryesore të Azisë Qendrore, si India, Irani dhe Pakistani.