Avionët luftarakë të NATO-s u ngritën në fluturim gjatë natës pasi Rusia nisi një valë të re sulmesh me dronë dhe raketa mbi Ukrainë, në një sulm që zgjati për 10 orë. Shpërthimet ndriçuan qiellin e natës në Kiev ndërsa raketat dhe dronët u panë mbi ndërtesa të larta. Në një natë tjetër të tensionuar dhe pa gjumë për banorët e kryeqytetit ukrainas, shumë njerëz u detyruan të nxitonin për t'u strehuar në stacionet nëntokësore. Forca ajrore e Ukrainës tha se Rusia lëshoi 426 dronë dhe 24 raketa gjatë natës në të gjithë vendin. Por vetëm 23 dronë goditën objektivat e tyre, shtuan zyrtarët. Të paktën 15 persona janë plagosur dhe viktima më e re raportohet të jetë një djalë 12-vjeçar. Presidenti i Ukrainës, Volodimir Zelenski foli për dy viktima në sulmet e natës. "Skuadrat e shpëtimit dhe emergjencave po punojnë në qytetet dhe komunitetet tona pas sulmit rus. Dëme janë raportuar në Kiev dhe në rajonin rreth tij, si edhe në rajonet Kharkiv dhe Ivano-Frankivsk. Valët e sulmeve zgjatën gjithë natën dhe vazhduan deri në mëngjes", tha Zelenski. Kjo shënoi herën e dytë në tre ditë që avionët luftarakë të NATO-s u ngritën në ajër për shkak të bombardimeve ruse. Komanda Operacionale e Forcave të Armatosura Polake tha se ngriti në ajër avionë luftarakë për shkak të intensitetit të sulmit. "Forcat ajrore polake dhe aleate të NATO-s kanë filluar operacionet dhe sistemet e mbrojtjes ajrore tokësore dhe të zbulimit me radar janë në nivelin më të lartë të gatishmërisë", tha në një deklaratë ushtria polake. Putin ka shtuar sulmet ndaj ukrainës ndërsa lufta e ashpër vazhdon. Javën e kaluar, rreth 600 dronë dhe 26 raketa u lëshuan në një nga sulmet më intensive që nga fillimi i luftës. Rusët ngritën bombarduesit strategjikë Tu-95MS dhe Tu-160 për të goditur Lvivin dhe Lutskun, si dhe Chernivtsin, në një sulm në Ukrainën perëndimore. Dy persona u konfirmuan të vrarë në Chernivtsi, afër kufirit rumun, me të paktën 18 të plagosur në sulmet e natës.