Forcat e Moskës u zmbrapsën në përpjekjet e tyre për të pushtuar qytetin kyc të Ukrainës, kur Rusia nisi pushtimin dy vjet më parë, por me Kievin të dobësuar nga mungesa e armëve nga aleatët e saj perëndimorë, Vladimir Putin po përpiqet përsëri. Rusia ka rihapur një front të madh në luftën e saj me Ukrainën, në një lëvizje që do të stërmundojë forcat tashmë të paarmatosura dhe inferiore në numër të Kievit, që mbeten në pritje të armëve perëndimore. Ushtria ruse lëshoi një breshëri artilerie dhe sulmesh ajrore në orët e hershme të mëngjesit të së premtes, ndërsa trupat tokësore tentuan inkursionin më të rëndësishëm në verilindje të Ukrainës, territor që ndan një kufi të gjatë me Rusinë. Luftimet e ashpra u ndezën gjatë fundjavës në pika të ndryshme përgjatë një brezi 72 km të gjatë të kufirit në rajonin e Harkivit. Moska pretendoi se kishte pushtuar pesë fshatra, ndërsa Volodymyr Zelensky, presidenti ukrainas, tha se betejat po zhvilloheshin rreth shtatë fshatra. Në shenjë të seriozitetit të sfidës, Ukraina po vendos forca rezervë për të ndihmuar në zmbrapsjen e sulmit rus dhe një komandant i lartë është caktuar për të udhëhequr përpjekjen. Koha e sulmit nuk mund të ishte më e keqe për Kievin, e kjo me sa duket është arsyeja pse Rusia vendosi të veprojë. Trupat ruse tashmë po fitojnë ngadalë terren në rajonin lindor të Donbasit duke iu afruar qytetit në majë të kodrës Chasiv Yar. Nëse kjo fortesë ukrainase bie, do t'u jepte trupave pushtuese një pikë të favorshme për të goditur më lehtë në pjesën tjetër të Donbasit, duke vënë në rrezik qytetet kryesore si Kramatorsku. Duke shtuar sulmet në drejtimin e Harkiv-it, Rusia mund t'i detyrojë komandantët ukrainas të devijojnë burimet nga Lindja në verilindje, duke dobësuar linjën e tyre mbrojtëse në Donbas, që tashmë është në vështirësi. Duke e bërë situatën edhe më kritike, vonesat në dërgimin e armëve dhe municioneve shtesë nga aleatët perëndimorë në vijën e frontit i kanë lënë të ekspozuara forcat ukrainase. Ndërsa Putini nuk e ka deklaruar hapur qëllimin e tij, Harkivi duket se është një punë e papërfunduar. Kryeqyteti rajonal ishte një objektiv kryesor i pushtimit në shkurt 2022. Forcat ruse pushtuan zona të rajonit të Kharkiv, por kurrë nuk arritën të pushtonin qytetin. Një kundërofensivë ukrainase në fund të verës 2022 i zbrapsi rusët. Por, Rusia nisi të kryente sulme të pandërprera me artileri dhe dronë kundër fshatrave dhe qyteteve të afërta, si dhe sulme me raketa me rreze më të gjatë kundër Harkivit. Agresioni u përshkallëzua javët e fundit përpara se të shpërthente në sulmin tokësor të së premtes.