Presidenti rus Vladimir Putin vizitoi rajonin perëndimor të Kurskut për herë të parë që kur forcat ruse dëbuan trupat ukrainase nga zona, muajin e kaluar. Kremlini tha se gjatë vizitës që u krye të martën, Putin u takua me organizata vullnetare në rajon dhe vizitoi termocentralin bërthamor Kursk-II. Televizioni shtetëror tregoi takimin e Putinit me vullnetarë dhe zyrtarë lokalë në rajon, përfshirë guvernatorin në detyrë Alexander Khinshtein. Putin shoqërohej nga Sergei Kiriyenko, zëvendësshefi i parë i shtabit të Kremlinit. Rusia tha në fund të prillit se kishte dëbuar trupat ukrainase nga rajoni i Kurskut, duke i dhënë fund inkursionit më të madh në territorin rus që nga Lufta e Dytë Botërore. Pak më shumë se dy vjet pas pushtimit të Rusisë në vitin 2022, Ukraina më 6 gusht nisi sulmin e saj më të guximshëm, duke kaluar kufirin rus në rajonin e Kurskut, e mbështetur nga një mori dronësh dhe armë të rënda perëndimore. Në kulmin e ofensivës, forcat ukrainase morën gati 1,400 kilometra katrorë tokë të Kurskut. Por, trupat ruse, të ndihmuara edhe nga ato të koresë së veriut, mundën t’i zbrapsin ukrainasit nga pjesë të mëdha të territorit. Vetë kievi ka thënë më herët se trupat e tij ende janë në rajon.