Presidenti rus, Vladimir Putin nuk do të marrë pjesë në samitin e G20-ës në Indonezi javën e ardhshme, tha një zyrtar i qeverisë indoneziane, duke shmangur kështu një konfrontim të mundshëm me Shtetet e Bashkuara të Amerikës dhe aleatët e saj për shkak të luftës në Ukrainë. Luhut Binsar Pandjaitan, organizues për ngjarjet e G20-ës, tha se vendimi i Putinit për të mos marrë pjesë ishte "më i miri për të gjithë ". Presidenti i SHBA-së Joe Biden, presidenti kinez Xi Jinping dhe liderë të tjerë botërorë do të marrin pjesë në samitin dy-ditor që fillon më 15 nëntor. Ky samit do të ishte hera e parë që Biden dhe Putin do të ishin bashkë në një mbledhje qëkur Rusia pushtoi Ukrainën në shkurt. Presidenti indonezian Joko Ëidodo është pritës i samitit të 20 ekonomive më të mëdha në botë në ishullin e Balit. “Është informuar zyrtarisht se presidenti rus Vladimir Putin nuk do të marrë pjesë në samitin e G20-ës dhe do të përfaqësohet nga një zyrtar i nivelit të lartë dhe kjo është diskutuar nga presidenti Joko Ëidodo dhe Putin në bisedat e mëparshme telefonike”, tha Pandjaitan pas takimit të zyrtarëve të sigurisë që më pas konfirmoi se ministri i jashtëm rus, Sertgei Lavrov, do të udhëheqë delegacionin rus. Ndërkohë, në samit nuk do të jetë i pranishëm as presidenti ukrainas, Volodimir Zelenski, që sidoqoftë do tu drejtohet liderëve në një lidhje video. Në fillim të këtij viti, presidenti indonezian udhëtoi drejt Kievit dhe Moskës, në një përpjekje për t'i bërë të dy udhëheqësit të ulen në Bali dhe të bëjnë paqe.