Më herët, një zyrtar i Shtëpisë së Bardhë kishte thënë se nuk kishte "plane" për një takim Trump-Putin "në të ardhmen e afërt", pasi Trump tha të enjten se të dy do të zhvillonin bisedime në Budapest brenda dy javësh. Dallimet kryesore mes propozimeve amerikane dhe ruse për paqe u bënë gjithnjë e më të qarta këtë javë, duke sinjalizar se janë shuar shanset për një samit. Trump dhe Putin u takuan për herë të fundit në Alaskë në gusht, gjatë një samiti të organizuar me nxitim i cili nuk dha rezultate konkrete. Vendimi i Shtëpisë së Bardhë për të shtyrë planet për një takim të dytë Trump-Putin mund të shihet si një përpjekje për të shmangur një skenar tjetër të ngjashëm. "Mendoj se rusët donin shumë dhe u bë e qartë për amerikanët se nuk do të ketë marrëveshje për Trumpin në Budapest", tha një diplomat i lartë evropian për Reuters. Një takim përgatitor mes Sekretarit amerikan të Shtetit Marco Rubio, dhe Ministrit të Jashtëm rus, Sergei Lavrov, ishte planifikuar të mbahej këtë javë, por Shtëpia e Bardhë tha se të dy kishin pasur një telefonatë "produktive" dhe se një takim nuk ishte më "i nevojshëm". Të hënën, Trump mbështeti një propozim për armëpushim të pranuar edhe nga Kievi dhe udhëheqësit evropianë për të ngrirë konfliktin në vijën aktuale të frontit. "Le të ndërpritet lufta kështu siç është", tha ai. "Unë thashë: ndërpriteni dhe ndaloni në vijën e betejës. Shkoni në shtëpi. Ndaloni së luftuari, ndaloni së vrari njerëz."