Top News – Putin ‘rrëzoi’ avionin mbi Ukrainë / Hetuesit ndërkombëtarë-furnizoi rebelët me raketa

Një ekip ndërkombëtar hetuesish tha se kishte gjetur “të dhëna të forta” se presidenti rus Vladimir Putin miratoi furnizimin me armë të rënda kundërajrore për separatistët ukrainas që rrëzuan avionin malajzian MH17 tmë 2014 me një raketë ruse. Megjithatë, anëtarët e Ekipit të Përbashkët të Hetimit thanë se kishin prova të pamjaftueshme për të ndjekur penalisht presidentin Putin ose ndonjë të dyshuar tjetër dhe ata pezulluan hetimin e tyre 8-vjeçar për rrëzimin që shkaktoi vdekjen e 298 personave në bordin e avionit Boeing 777 që fluturonte nga Amsterdami në Kuala Lumpur. Rusia gjithmonë ka mohuar çdo përfshirje në rrëzimin e fluturimit mbi Ukrainën lindore më 17 korrik 2014 dhe ka refuzuar të bashkëpunojë me hetimin ndërkombëtar. Prokurorët holandezë thanë se “ka tregues të fortë se presidenti rus vendosi të furnizojë” separatistët ukrainas me një sistem Buk raketash, arma që rrëzoi MH17. “Megjithëse flasim për tregues të fortë, standardi i lartë që duhet arritur që prova të konsiderohet përfundimtare nuk është arritur”, tha prokurorja holandeze Digna van Boetzelaer, duke shtuar se pa bashkëpunimin rus, “hetimi tani ka arritur kufirin e tij. Të gjitha pistat janë ezauruar”. Ajo tha gjithashtu se, si kreu i shtetit rus, Vladimir Putin do të kishte imunitet nga ndjekja penale në Holandë. Ekipi publikoi një regjistrim të një telefonate të përgjuar në të cilën ata thanë se Putin mund të dëgjohej duke diskutuar për konfliktin në Ukrainën lindore. “Ne jemi vërtet të qartë se çfarë ka ndodhur, por përgjigja e pyetjes pse u rrëzua MH17 mbetet ende në Rusi” thanë hetuesit.