Një person ka humbur jetën dhe katër të tjerë janë plagosur në sulmin e fundit me raketa të Rusisë, në kryeqytetin e Ukrainës gjatë natës. Kryebashkiaku i Kievit, Vitali Klitschko tha se një vajzë nëntë vjeçare ishte mes të plagosurve në sulmin e kryer në orët e para të mëngjesit të së mërkurës. "Rusia kreu një sulm me raketa në Kiev dhe rajonin e Kievit", tha Andriy Yermak, kreu i zyrës së Zelenskyt. "Kështu dëshiron ta përfundojë luftën presidenti rus Vladimir Putin", shtoi ai në Telegram. Shërbimet e urgjencës u thirrën në të paktën katër qarqe të kryeqytetit ukrainas, dhe administrata ushtarake tha se shpërthyen zjarre në disa ndërtesa, përfshirë në ndërtesa banimi.Ushtria ukrainase tha se kishte rrëzuar gjashtë nga shtatë raketa balistike dhe 71 dronë të lëshuar nga Rusia gjatë natës. Ndërkohë, qyteti Kryvyi Rih pa dëmtime në infrastrukturë dhe ndërtesa banimi pasi edhe ai u shënjestrua në një sulm me raketa gjatë natës, tha në Telegram guvernatori rajonal i Dnipropetrovskut, Serhiy Lysak. Duke reaguar ndaj sulmit, Zelenski tha se presidenti rus Vladimir Putin "nuk po përgatitej për paqe". “Ai vazhdon të vrasë ukrainasit dhe të shkatërrojë qytete. “Tani për tani, ne kemi nevojë për unitet dhe mbështetje nga të gjithë partnerët tanë për një përfundim të drejtë të kësaj lufte”, ka shkruar ai në Telegram. NJë ditë më parë, si pasojë e sulmeve ajrore masive të rusisë mbi Ukrainë, vendet e natos u detyruan të ngrinin në fluturim avionët e NATO-s, për të mbrojtur kufirin lindor të aleancës.