Presidenti rus Vladimir Putin së shpejti mund të njoftojë pjesëmarrjen e tij në zgjedhjet presidenciale të vitit 2024, raportoi të martën gazeta Kommersant, zgjedhje këto që i hapin rrugën shefit të Kremlinit të qëndrojë në pushtet deri në vitin 2030. Në kuadër të një konference, në nëntor, zyrtarët besojnë se Putin mund të njoftojë se do të marrë pjesë në zgjedhjet e marsit të vitit të ardhshëm, raportoi Kommersant, duke cituar burime të paidentifikuara pranë administratës presidenciale. Putin, të cilit posti i presidentit iu dorëzua nga Boris Yeltsin në ditën e fundit të vitit 1999, ka qenë lider i Rusisë për një kohë më të gjatë se cdo sundimtar tjetër rus që nga Josef Stalini, duke mundur madje edhe mandatin 18-vjeçar të Leonid Brezhnev. Presidenti rus mbush 71 vjeç më 7 tetor. Ndërsa shumë diplomatë, spiunë dhe zyrtarë kanë thënë se presin që Putini të qëndrojë në pushtet për gjithë jetën, nuk ka ende ndonjë konfirmim të planeve të tij për të kandiduar në zgjedhjet presidenciale të vitit 2024. Zëdhënësi i Kremlinit, Dmitry Peskov, tha muajin e kaluar se nëse Putin vendos të kandidojë, atëherë askush nuk do të jetë në gjendje ta mundë atë. Ndërsa Putini mund të mos përballet me konkurrencë për vota, ish-spiuni i KGB-së përballet me sfidat më serioze me të cilat është përballur çdo shef i Kremlinit që nga koha e Mikhail Gorbachev. Lufta në Ukrainë ka shkaktuar konfrontimin më të madh të Rusisë me Perëndimin që nga kriza e raketave Kubane e vitit 1962 ndërkohë që ekonomia e vendit ka pësuar tronditjen më të madhe në dekada.