Raketat ruse kanë goditur qytetet më të mëdha të Ukrainës duke lënë katër të vdekur dhe dhjetëra të plagosur pasi Vladimir Putin premtoi se do të intensifikojë sulmet. Një grua u vra dhe 41 përsona të tjerë u plagosën në qytetin verilindor të Harkivit, sipas zyrtarëve lokalë. Kryebashkiaku i Kievit tha se të paktën një person u vra dhe 27 u plagosën ndërsa disa blloqe apartamentesh u goditën nga sulmet ruse. Dy viktima të tjera u raportuan në rajonin përreth Kievit. Ka patur ditët e fundit sulme të mëdha ajrore nga të dyja palët. Rusia ndërmori fushatën më të madhe të bombardimeve ajrore gjatë gjithë luftës, javën e kaluar, duke vrarë 39 persona. Forcat ukainase u përgjigjën me një sulm në qytetin kufitar rus të belgorodit të shtunën, ku mbetën të vrarë rreth 25 persona dhe u plagosën më shumë se 100 të tjerë. Presidenti rus, Vladimir Putin, premtoi se sulmi nuk do të kalonte pa ndëshkim ndërsa presidenti ukrainas, Volodimir Zelenski, tha se vetëm të dielën, Moska kishte lëshuar 170 dronë dhe dhjetëra raketa. Forcat ajrore ukrainase thanë në telegram më herët të martën, se kishin rrëzuar 35 dronë të lëshuar nga rusia, mbrëmjen e të hënës. Bombarduesit strategjikë rusë pasuan sulmet me dronë, me sulme të reja me raketa kruiz dhe raketa supersonike. Zyrtarët e Kievit thanë se mbetjet e raketave dhe dronëve të shkatërruar rusë kishin goditur ndërtesat e larta, magazina dhe supermarkete dhe se një grua e moshuar kishte humbur jetën si pasojë e lëndimeve. Energjia elektrike dhe furnizimi me ujë të pijshëm ishte ndërprerë në disa zona të kryeqytetit dhe tubacionet e gazit po ashtu ishin dëmtuar në një rajon. Guvernatori rajonal i Harkivit, Oleyh Syniehuboy tha se qendra e qytetit ishte goditur dhe forcat ajrore thanë se ishin përgatitur për më shumë sulme. Kryebashkiaku i Mikolaivit në ukrainën jugore tha se mbrojtja ajrore kishte rrëzuar dronë mbi qytet, me mbetjet e tyre që kishin shkaktuar një zjarr.