Presidenti i Ukrainës, Volodymyr Zelensky, në fjalimin e tij të përnatshëm, kritikoi Perëndimin për mungesën e reagimit ndërsa Ukraina perëndimore dhe rajone të tjera po përpiqen të rimarrin veten nga një sërë sulmesh ajrore ruse që vranë të paktën pesë persona. “Fatkeqësisht, nuk ka pasur asnjë reagim të denjë e të fortë nga bota ndaj të gjithë kësaj që po ndodh; ndaj rritjes së vazhdueshme të sulmeve”, tha Zelensky. “Pikërisht për këtë shkak Putin vazhdon ta bëjë këtë. Ai tallet hapur me Perëndimin, me heshtjen e tij dhe mungesën e veprimeve të forta në përgjigje”, theksoi ai. Zelensky u ankua se “çdo” raketë dhe dron i lëshuar nga Kremlini “përmban pjesë me të cilat Rusia furnizohet ende” nga vendet perëndimore dhe vende të tjera, duke përmendur kompani nga Shtetet e Bashkuara, Kina, Tajvani, Britania, Gjermania, Zvicra, Japonia, Koreja e Jugut dhe Holanda. “E gjithë kjo duhet të ndalet”, shtoi ai. Sulmet e fundit të Rusisë në rajonin e Lvivit, larg vijave të frontit dhe pranë kufirit polak, të dielën, nxitën Poloninë dhe aleatët e NATO-s të ngrënë avionë luftarakë në ajër dhe të vendosnin forcat tokësore në gatishmëri të lartë. “Forcat ajrore polake dhe aleate po operojnë në hapësirën tonë ajrore, ndërsa sistemet tokësore të mbrojtjes ajrore dhe zbulimit me radar janë vendosur në gjendjen më të lartë të gatishmërisë”, njoftoi komanda operacionale e Polonisë në një postim në rrjetet sociale. Polonia i përshkroi këto masa si veprime “parandaluese” të destinuara për të “siguruar hapësirën ajrore dhe për të mbrojtur qytetarët, veçanërisht në zonat pranë rajoneve të kërcënuara”. Ky veprim vjen pothuajse një muaj pas një incidenti ku dhjetëra dronë rusë fluturuan në hapësirën ajrore të Polonisë, duke detyruar avionët e NATO-s të ngriheshin për t’i kapur dhe rrëzuar disa prej tyre. Të paktën pesë persona u vranë dhe dhjetë të tjerë u plagosën në një sulm rus, të dielën, që sipas Zelenskit përfshinte “më shumë se 50 raketa dhe rreth 500 dronë”. Sulmet ndërprenë furnizimin me energji elektrike për dhjetëra mijëra njerëz dhe dëmtuan ndërtesa e infrastrukturë.