Presidenti ukrainas Volodymyr Zelensky paralajmëroi se Kievi e sheh Rusinë duke u përgatitur për një “luftë të madhe” në Evropë që mund të fillojë që në vitin 2029. “Ne kemi nevojë për më shumë presion mbi Rusinë. Sipas situatës në fushën e betejës, nuk shohim që Rusia do të ndalet”, tha Zelensky në një postim në X herët të enjten në mëngjes. “Problemi është se industria ushtarake mbrojtëse e Rusisë po rrit prodhimin. Dhe vlerësimi ynë është se ata duan ta vazhdojnë këtë luftë. Mendojmë se nëse kemi presion të madh, rusët do të kenë nevojë për një pauzë. Por ne duhet ta pranojmë se ata duan një luftë të madhe dhe duhet të përgatitemi për të në vitin 2029 ose 2030. Një luftë në kontinentin evropian është një sfidë vërtet e madhe. Mendoj se duhet t'i ndalojmë ata tani në Ukrainë. Por edhe të bëjmë gjithçka për të ulur aftësitë e tyre". Postimi i Zelenskit përsërit thirrjet e Kievit për sanksione më të ashpra ndaj Rusisë, veçanërisht eksporteve të saj të energjisë që financojnë makinën e luftës së Moskës. Parlamenti Evropian ka propozuar përshpejtimin e ndalimit të plotë të importeve të karburanteve fosile ruse që të hyjë në fuqi deri më 1 janar 2027. Komentet e presidentit ukrainas gjithashtu i bëjnë jehonë paralajmërimeve nga udhëheqësit evropianë se Moska mund të jetë duke u përgatitur për një luftë në shkallë të gjerë në Evropë deri në fund të dekadës.