Humbjet e mëdha në luftën e hapur në Ukrainë po e detyrojnë Vladimir Putin që të shtyjë drejt frontit tanket dhe mjetet e blinduara që u nxorrën jashtë përdorimit ushtarak që në fillim të viteve 2000. Siç raporton DailyMail, Rusia ka zhvendosur të paktën 1570 tanke që flinin prej vitesh në një bazë ushtarake të mjeteve të blinduara në Siberi. Tanket janë prodhim para vitit 1975, madje një pjesë e mirë e tyre prodhim të viteve të para të pas luftës së dytë botërore. Ekspertët thonë se gati gjysma e 3840 tankeve dhe mjeteve të tjera ushtarake të bazës Vagzhanovo janë lëvizur, riparuar dhe hedhur në frontin ukrainas të luftës. Kjo konfirmohet edhe nga fotot që ka kapur inteligjenca ukrainase në vijën mbrojtëse ruse në jug dhe lindje të vendit. Përdorimi i makinerisë së epokës sovjetike nuk është një risi, por pamjet tregojnë, sipas ekspertëve përmasat e tyre në luftë dhe dëshpërimin e Vladimir Putinit për të mos dështuar në luftën e nisur dhe për t’i bërë ballë ofensivës ukrainase.