Presidenti rus Vladimir Putin tha të premten se shpresonte që bisedimet e paqes mEs Rusisë dhe Ukrainës të vazhdonin dhe se grupet e punës mund të diskutonin kompromise të mundshme, por tha se qëllimet e Moskës mbeteshin të pandryshuara. Duke folur një javë para skadimit të afatit të caktuar nga Presidenti i Shteteve të Bashkuara të Amerikës, Donald Trump, që Rusia të binte dakord për një armëpushim në Ukrainë ose të përballej me sanksione të reja, duke përfshirë edhe vendet që blejnë eksportet e saj të energjisë, Putin nuk dha asnjë shenjë për ndonjë ndryshim në qëndrimin e Moskës. Ai tha se nëse dikush ishte i zhgënjyer nga rezultati i bisedimeve të paqes deri më sot, kjo ishte pasojë e pritjeve të ekzagjeruara. Duke folur me gazetarët në një takim me Presidentin bjellorus Alexander Lukashenko në Rusinë veriore, Putin tha se bisedimet duhet të zhvillohen "pa kamera dhe në një atmosferë të qetë". Ai tha se trupat ruse po sulmonin Ukrainën përgjatë gjithë vijës së frontit dhe se momenti ishte në favor të Rusisë, duke cituar njoftimin e Ministrisë së tij të Mbrojtjes të enjten se forcat e Moskës kishin pushtuar qytetin ukrainas të Chasiv Yarit pas një beteje 16-mujore.