Një përplasje diplomatike duket se po ndodh mes anëtarëve të G7-ës lidhur me një deklaratë të përbashkët në përvjetorin e tretë të pushtimit rus të Ukrainës, me Shtetet e Bashkuara që po i rezistojnë një referimi për "agresionin rus" në dokument. Mosmarrëveshja, e përshkruar nga dy zyrtarë perëndimorë të njohur me këtë çështje, pasqyron ndryshimin më të madh të qasjes nga Shtëpia e Bardhë ndaj konfliktit. Presidenti Donald Trump ka fajësuar Ukrainën për luftën dhe e krahasoi presidentin e saj me një "diktator". Kjo bie në kontrast të plotë me mënyrën se si administrata Biden, së bashku me aleatët e saj në G7, e kanë përshkruar luftën gjatë tre viteve të fundit. Grupi do të mblidhet javën e ardhshme, në kohën e përvjetorit të pushtimit, por rezistenca nga Uashingtoni për fajësimin e Rusisë për konfliktin po kërcënon vendosmërinë perëndimore ndërsa lufta hyn në vitin e saj të katërt. "Agresioni rus" është fraza e përdorur në deklaratat e G7 që datojnë që nga fillimi i konfliktit, ashtu si edhe përshkrimi i konfliktit si "luftë agresioni e paligjshme". Tani, të dërguarit nga Uashingtoni kanë shprehur shqetësimin se si lufta është përshkruar në dokument, thanë zyrtarët. Trump ka sugjeruar gjithashtu që Rusia të lejohet t'i bashkohet G7-ës pasi ajo u dëbua pas aneksimit të Krimesë në 2014. Zyrtarët thanë se SHBA-ja po i rezistonte gjuhës që fajësonte Rusinë për luftën, por se vendet e tjera në grup kanë qenë të bindur se çdo zbutje e deklaratës do të ishte një fitore për Moskën. "Bisedimet janë ende duke u zhvilluar," tha një nga zyrtarët, "por ka shumë shqetësime për sa i takon përcaktimit se kush është përgjegjës për luftën." Shtëpia e Bardhë nuk iu përgjigj një kërkese për koment, por në një konferencë për shtyp të enjten, këshilltari amerikan për sigurinë kombëtare, Mike Ëaltz tha se presidenti Trump është i zemëruar me homologun ukrainas Volodomyr Zelensky, një ditë pasi ai e quajti atë një diktator.