SHBA-ja dhe Koreja e Jugut kanë paralajmëruar Vladimir Putinin kundër krijimit të lidhjeve më të ngushta ushtarake me Korenë e Veriut, pasi flitet se lideri rus do të vizitojë vendin e izoluar në ditët në vijim. Putini po planifikon të takohet me liderin e Koresë së Veriut, Kim Jong-un, në një vizitë që pason atë të liderit koreanoverior në Rusi, shtatorin e kaluar, raportojnë mediat. Gjatë atij udhëtimi, të dy liderët besohet se kanë rënë dakord që Koreja e Veriut të marrë ndihmën nga Rusia për programin e saj hapësinor në këmbim të ofrimit të armëve që rusia do ti përdorë në luftën e saj në ukrainë, në kundërshtim me rezolutat e OKB-së. Moska i ka quajtur raportet se po përdor armë dhe municione të Koresë së Veriut në Ukrainë, si "absurde", por mbetjet nga një raketë që ra në qytetin ukrainas të Kharkivit, më 2 janar, mbanin shenja që tregonin se ato ishin prodhim koreanoverior. Kurt Campbell, zëvendëssekretari amerikan i shtetit, i tha homologut të tij koreano-jugor, Kim Hong-kyun, këtë javë se lidhjet më të ngushta ushtarake mes Phenianit dhe Moskës do të shkaktojnë paqëndrueshmëri të mëtejshme në rajon. “Ndërsa monitorohen nga afër zhvillimet e ndërlidhura, palët ranë dakord të përgjigjen me vendosmëri përmes bashkëpunimit të fortë ndaj provokimeve të Koresë së Veriut dhe veprimeve që përshkallëzojnë tensionet në rajon”, tha në një deklaratë të premten Ministria e Jashtme e Koresë së Jugut.