Rusia e ka gjetur veten nën sulme të reja ukrainase të premten, përfshirë ato në portin e Berdianskut dhe në rajonin kufitar të Belgorodit. Pamje filmike tregonin vendin e një shpërthimi që duket se është shkaktuar nga një raketë e dhënë nga Britania e Madhe, Storm Shadou, në detin Azov në pjesën ukrainase të kontrolluar nga rusia. Një re e stërmadhe tymi është parë të ngrihet nga një zonë e portit në rajonin e Zaporizhias, të pushtuar nga trupat ruse. Media shtetërore ruse tha se ka patur atje viktima dhe shkatërrim si pasojë e sulmit. Shënjestra e saktë nuk është bërë e qartë menjëherë. Storm Shadou është një raketë kruiz që lëshohet nga ajri dhe mund të fluturojë me shpejtësi 1 mijë km në orë dhe mund të godasë shënjestra deri në 600 km largësi, distancë kjo që më parë nuk ka qenë e arritshme për Ukrainën. Kjo do të thotë se arma mund të godasë shënjestrat në një distancë maksimale në vetëm 35 minuta. Më 26 maj, një shpërthim masiv i ngjashëm u pa në një depo armësh ruse dhe u tha se edhe në atë rast ishte përdorur një raketë britanike. Pamjet treguan një lëmsh të madh zjarri që shpërthente pas goditjes mbi një arsenal raketash ruse S-300, në të njëjtin port ku u raportua edhe ky sulm i fundit.