Presidenti amerikan Donald Trump dhe ai francez Emmanuel Macron shfaqën dallime të mëdha në qëndrimin e tyre ndaj Ukrainës, duke nxjerrë në pah dallimet mes Shteteve të Bashkuara dhe Evropës mbi propozimin e Trump për një marrëveshje të shpejtë armëpushimi me Rusinë. Gjatë një dite bisedimesh, Presidentët Trump dhe Macron treguan një raport miqësor të bazuar në vite të marrëdhënieve të mira mes tyre. Por Macron e bëri të qartë se nuk ishte dakord me Trump për disa çështje kyçe, ndërsa ata shënuan tre vjetorin e fillimit të sulmit të Rusisë në shkallë të gjerë ndaj Ukrainën. Presidenti Trump nuk pranoi t'i referohej presidentit rus Vladimir Putin si diktator, ndërkohë që e quajti Presidentin e Ukrainës Volodymyr Zelenski një diktator javën e kaluar. Presidenti Macron tha se është e qartë se Rusia "është agresore" në konflikt, një temë për të cilën Presidenti Trump ishte i lëkundur javën e kaluar. “Presidenti Putin shkeli paqen”, tha Macron në një konferencë të përbashkët për shtypin me Presidentin Trump. Trump shprehu dëshirën për arritjen e një armëpushimi sa më shpejt që të jetë e mundur. Ai tha se mund të shkonte në Moskë për të takuar Putinin pasi të arrihej një marrëveshje armëpushimi. Presidenti Macron, nga ana tjetër, kërkoi një qasje më të fortë, duke filluar me një armëpushim dhe më pas një marrëveshje paqeje që do të përfshinte garanci sigurie. "Ne duam paqe të shpejtë, por nuk duam një marrëveshje të dobët", tha Macron për gazetarët. Çdo marrëveshje paqeje, tha ai, duhet të "vlerësohet, kontrollohet dhe verifikohet". Të dy udhëheqësit ranë dakord, megjithatë, për dislokimin e forcave paqeruajtëse evropiane sapo të arrihet një marrëveshje paqeje. "Ata nuk do të ishin në vijën e parë të frontit. Ata nuk do të ishin pjesë e asnjë konflikti. Ata do të ishin aty për të garantuar respektimin e marrëveshjes së paqes", tha Presidenti Macron më herët në Shtëpinë e Bardhë, në praninë e Presidentit Trump. Ky i fundit tha se ai e pranon konceptin, ashtu si edhe Putini. "Po, ai do ta pranojë këtë", tha Trump. "Unë e bëra atë pyetje në mënyrë specifike. Ai nuk ka asnjë problem me këtë." Macron, udhëheqësi i parë evropian që takohet me Trump në Shtëpinë e Bardhë, pas marrjes së detyrës një muaj më parë. Macron po përpiqet të përfitojë nga një marrëdhënie e mirë me Trump, që ai e ndërtoi gjatë mandateve të tyre të para presidenciale. Udhëheqësi francez ka arritur t’i menaxhojë me sukses marrëdhëniet me Trumpin, i cili ka qenë i paparishikueshëm në përballjet me udhëheqësit botërorë, pa e zemëruar atë. Në një moment gjatë takimit të tyre, Macron preku krahun e Trump dhe korrigjoi me kujdes pretendimin e tij se Evropa kishte dhënë të gjithë ndihmën e saj për Ukrainën në formë huaje.