Ndërsa e gjithë vëmendja është përqendruar në Lindjen e Mesme aty ku konflikti mes Izraelit dhe Iranit ka implikuar dhe Shtetet e Bashkaura të Amerikës, Rusia ka ndërmarrë një valë sulmesh drejt kryeqytetit të kievit duke e bombarduar me dronë e raketa. Dronët dhe raketat goditën zona banimi, spitale dhe infrastrukturë sportive në disa qarqe të Kievit, sipas shërbimeve të emergjencës. Dëmet më të mëdha u raportuan në qarkun Shevçenkivski, ku një pjesë e një ndërtese pesëkatëshe u shemb. Nga ofensiva ajrore e ndërmarë gjatë natës, shërbimet e emergjencës të Ukrainës njoftuan se humbën jetën të paktën 6 persona dhe u plagosën dhjetëra të tjerë. Ekipet për shpëtim dhe zjarrfikësit po përpiqen të nxjerrin njerëz që besohet se kanë ngecur nën rrënojat e një ndërtese banimi, e cila është shembur pjesërisht pas bombardimeve. Mes të plagosurve kanë qenë dhe tre fëmijë. Kryetari i bashkisë së Kievit, Vitali Klitschko, u tha gazetarëve nga vendi i ngjarjes se shpreson që të mos ketë më shumë viktima. Ofensiva e Moskës erdhi një javë pas sulmit të kombinuar që ndërmori javën e kaluar ku mbetën të vrarë 28 njerëz. Presidenti i Ukrainës, Volodymyr Zelensky, e quajti atë sulm si një nga bombardimet më të mëdha të luftës, e cila është tani në vitin e katërt.