Vladimir Putin ka shkarkuar ministrin e tij besnik të mbrojtjes dhe e ka zëvendësuar atë me një person që nuk ka asnjë përvojë ushtarake, në një riorganizim të qeverisë ruse. Ai shkarkoi kështu nga posti mikun e tij të hershëm Sergei Shoigu, 68 vjeç, dhe e transferoi atë në rolin e sekretarit të këshillit të sigurisë kombëtare të Rusisë. Sipas raporteve, Putin ka propozuar ekonomistin pak të njohur Andrey Belousov, 65 vjeç, për të zëvendësuar Shoigun si ministër të mbrojtjes. Zëdhënësi i shtypit të Kremlinit, Dmitry Peskov, duke komentuar vendimin, tha se duhet që ministria e mbrojtjes të mbetet 'inovatore' dhe të përdorë më mirë shpenzimet e mbrojtjes për të fituar luftën në Ukrainë. Lëvizja duket të jetë një mospërfillje e habitshme për Shoigun, njeriun që Putin e vendosi në krye të luftës së tij, një aleat i ngushtë dhe ministri më jetëgjatë i Rusisë. Deri më tani, Putini kishte qëndruar në krah të Shoigu, pavarësisht nga një sërë problemesh në vitin e parë të luftës dhe pavarësisht përplasjeve të tij publike me shefin e mercenarëve të Ëagnerit, Yevgeny Prigozhin, i cili nisi edhe një kryengritje vitin e kaluar duke kërkuar pikërisht largimin e Shoigu. Riorganizimi i komandës ushtarake është më i rëndësishmi që Putini ka ndërmarrë që nga fillimi i pushtimit të Ukrainës në shkurt 2022. Analistët argumentojnë se emërimi i një ekonomisti civil si ministër i mbrojtjes sugjeron që Putini synon të marrë një rol më të madh personal në taktikat e luftës. Ndërkohë, Sekretari i Mbrojtjes i Mbretërisë së Bashkuar, Grant Shapps, ka parashikuar se ministri i ri i mbrojtjes do të jetë thjesht një nga "kukullat" e Putinit.