Në fillim të sulmit në shkallë të gjerë të Rusisë ndaj Ukrainës në shkurt të vitit 2022, disa analistë parashikuan rënien e Kievit në duart e forcave ruse brenda tre ditësh. Por kjo nuk ndodhi. Ndërsa lufta hyn në vitin e tretë, Presidenti rus Vladimir Putin po përpiqet që dështimin fillestar të ushtrisë ruse ta shndërrojë në një avantazh, duke shpresuar tek zbehja e ndihmës së Perëndimit për Ukrainën, ndërsa Moska vazhdon trysninë ushtarake në vijat e frontit. Kjo strategji afatgjatë e Putinit po ndikon negativisht edhe brenda Rusisë, sepse konflikti po dëmton rëndë Rusinë, duke shteruar burimet e saj ekonomike, ushtarake dhe duke nxitur tensionet sociale. Megjithatë, vdekja e udhëheqësit të opozitës ruse, Alexei Navalny shërben si një kujtesë rrëqethëse e goditjes së pamëshirshme të Kremlinit ndaj kundërshtarëve të tij politikë. Presidenti Putin ka sinjalizuar vazhdimisht se do të donte të negocionte përfundimin e luftës, por ka paralajmëruar se Rusia nuk do të heqë dorë nga territoret e pushtuara. Në fillim të këtij muaji, ai shfrytëzoi një intervistë me ish-gazetarin e Fox Neës, Tucker Carlson, për të nxitur Shtetet e Bashkuara që të bindin Ukrainën të hyjë në bisedime paqeje, duke theksuar se "herët a vonë, ne do të arrijmë një marrëveshje". Dhe disa zhvillime të fundit kanë shtuar optimizmin e Kremlinit. Një projektligj mbi ndihmat për Ukrainën vazhdon të jetë i bllokuar në Kongresin amerikan, ndërsa aleatët e NATO-s janë përpjekur të plotësojnë mungesat e ndihmës amerikane pas fillimit të kundërofensivës së Ukrainës verën e kaluar. Vendimi i presidentit ukrainas Volodymyr Zelensky për të shkarkuar shefin e tij të ushtrisë, gjeneralin Valeri Zaluzhni, në anën tjetër, zhgënjeu shumë njerëz në ukrainë dhe shkaktoi shqetësim mes aleatëve perëndimorë. Ndërkohë, ish-presidenti amerikan Donald Trump, i cili në mënyrë të përsëritur ka thënë se do të negociojë një marrëveshje të shpejtë për t'i dhënë fund luftës nëse ai zgjidhej për një mandat tjetër, së fundmi tronditi NATO-n duke thënë se ai mund të lejonte Rusinë të zgjeronte agresionin e saj në Evropë, nëse vendet anëtare të aleancës nuk do t’i rrisnin shpenzimet e tyre të mbrojtjes. Për disa analistë, rikthimi i Trumpit do t'i shërbente qëllimeve të Putinit. Dhe ndërsa kremlini pret të shohë edhe shenja të tjera të dobësimit të mbështetjes perëndimore për Ukrainën, forcat ruse pushtuan qytetin e Avdiivkas gjatë fundjavës pas një beteje të ashpër në të cilën forcat ukrainase raportuan një mungesë gjithnjë e më të madhe municionesh. Pushtimi i këtij qyteti i ka hapur rrugën moskës për një ofensivë të mundshme më thellë në territorin e kontrolluar nga ukraina.