Presidenti rus Vladimir Putin tha të enjten se nuk kishte asgjë të pazakontë në një stërvitje të planifikuar që përfshin vendosjen praktike të armëve bërthamore taktike në Rusinë jugore, së bashku me Bjellorusinë aleate. Rusia njoftoi të hënën se do të praktikonte vendosjen e armëve bërthamore taktike si pjesë e një stërvitjeje ushtarake pas atyre që Moska tha se ishin kërcënime nga Franca, Britania dhe Shtetet e Bashkuara. "Nuk ka asgjë të pazakontë këtu, kjo është dicka e planifikuar," tha Putin, “është një stërvitje”. Ministria ruse e mbrojtjes, në njoftimin e saj, e lidhi stërvitjen bërthamore me "deklaratat provokuese dhe kërcënimet e disa zyrtarëve perëndimorë kundër Federatës Ruse". Putin tha vitin e kaluar se Moska kishte transferuar disa armë bërthamore taktike në Bjellorusi, lëvizja e parë e armëve të tilla jashtë Rusisë që nga rënia e Bashkimit Sovjetik në vitin 1991. Putin tha ndërkohë se i kishte sugjeruar Bjellorusisë që të merrte pjesë në një nga pjesët e stërvitjes bërthamore të shpallur të hënën. "Ne i bëjmë këto stërvitje rregullisht," tha presidenti rus duke sqaruar se këtë herë ato mbahen në tre faza. “Në fazën e dytë, kolegët bjellorusë do t'i bashkohen veprimeve tona të përbashkëta", tha Putin. Ndërsa presidenti bjellorus, Aleksandër Lukashenko, tha se kjo ishte stërvitja e tretë e tillë që dy vendet kryenin së bashku. Rusia dhe Shtetet e Bashkuara janë deri tani fuqitë më të mëdha bërthamore në botë, duke mbajtur më shumë se 10,600 nga 12,100 koka bërthamore që ka në botë. Kina ka arsenalin e tretë më të madh bërthamor, e ndjekur nga Franca dhe Britania.