Në mes të luftës që tashmë ka hyrë në vitin e katërt të saj, presidenti rus Vladimir Putin po mbledh trupa pranë kufirit të rusisë me Ukrainën përpara një përpjekjeje të madhe për të hyrë në rajonin verilindor të Sumy-t, tha presidenti ukrainas Volodymyr Zelensky të shtunën në mëngjes. Zelensky ka hedhur poshtë ndërkohë pretendimet e Putinit se trupat e Kievit në rajonin e Kurskut në Rusi janë të rrethuara nga forcat ruse. Blogerët ushtarakë pro-rusë kanë kundërshtuar po ashtu pretendimet e Putinit për rrethimin e trupave ukrainase në kursk. Ndërsa Instituti për Studimin e Luftës, me bazë në SHBA, tha të premten se kjo retorikë e Putinit tregon se Moska po sajon pretendime për të ndikuar në skenën politike dhe informative. As Rusia dhe as Ukraina nuk duan të tregojnë shenja dobësie ndërsa negociatat vazhdojnë për një armëpushim të mundshëm 30-ditor që Shtetet e Bashkuara po përpiqen ta ndërmjetësojnë. Të dy vendet duan të maksimizojnë pozicionet e tyre negociuese përpara se të nisin bisedimet e plota të paqes. Rusia ka bërë përparime që nga mesi i vitit të kaluar dhe Ukraina është përballur me probleme të mëdha pas kthimit të donald trump në shtëpinë e bardhë, i cili ka thënë se do t'i japë fund luftës shpejt dhe ka treguar gatishmëri për të punuar me Putinin, pavarësisht shqetësimeve nga aleatët evropianë dhe Kievi. Ukraina, e cila mbështetet në ndihmën ushtarake amerikane për mbrojtjen e saj ka frikë se Trump do ta detyrojë atë të bëjë kompromise të dhimbshme me Putinin pa garantuar sigurinë e saj në të ardhmen.