Presidenti i Rusisë, Vladimir Putin, do të bëjë një vizitë zyrtare në Emiratet e Bashkuara Arabe dhe në Arabinë Saudite, të mërkurën, bëri të ditur një zëdhënës i Kremlinit. Udhëheqësi rus, po ashtu, do të zhvillojë bisedime në Rusi, një ditë më vonë, me presidentin e Iranit, njoftoi zëdhënësi. I pyetur nëse Putin do të diskutojë për veprime të mundshme të koordinuara ndaj tregjeve globale të naftës gjatë qëndrimit në vendet e Gjirit, zëdhënësi Dmitry Peskov tha se këto bisedime janë mbajtur në kuadër të grupit OPEC+, që përbëhet nga Organizata e Vendeve Eksportuese të Naftës dhe aleatët e saj, por se çështja është gjithmonë në agjendë. Vizita e Putinit në Emirate dhe në Arabinë Saudite vjen pasi OPEC+ pranoi të enjten e kaluar reduktimin vullnetar të furnizimeve me rreth 2.2 milionë fuçi në ditë, një lëvizje që u prit me skepticizëm nga tregu i naftës.