Presidenti rus, Vladimir Putin, priti kryediplomaten e Koresë së Veriut në Kremlin teksa forcat ruse po vazhdojnë ofensivën e tyre në lindje të Ukrainës, duke depërtuar në një qytet kyç të vendit, në mes të luftimeve të ashpra. Mediat e Koresë së Veriut thanë se ministrja e Jashtme, Choe Son Hui, diskutoi “shumë projekte të ardhshme për të forcuar dhe zhvilluar vazhdimisht” raportin dypalësh, duke i përcjellë po ashtu Putinit “respektin vëllazëror” të udhëheqësit Kim Jong Un. Detaje të tjera për takimin nuk janë dhënë. Koreja e Veriut është bërë një mbështetëse kyç e luftës gati katërvjeçare të Rusisë kundër Ukrainës, duke dërguar artileri, raketa dhe trupa në Rusi. Peniani në këmbim ka marrë teknologji ushtarake ruse dhe ndihmë ekonomike. Vizita e kryediplomates së Koresë së Veriut vjen teksa Rusia ka vështirësi që të mbajë nivelin e rekrutimeve përballë humbjeve në rritje dhe stimulimeve financiare të ulëta. Javën e kaluar, Rusia njoftoi se do të përdorte rezervistët për të mbrojtur infrastrukturën civile, pas rritjes së sulmeve ukrainase me dronë. Një lëvizje e tillë potencialisht do t’i lejonte Moskës që të kishte më shumë trupa për të luftuar në front, ku po përballet me humbje të mëdha në përpjekjen e saj për të marrë sa më shumë territor të Ukrainës. Rusia po ashtu raportohet se po synon të rekrutojë më shumë luftëtarë të huaj për të mbushur radhët e ushtrisë. Deri më tani, Koreja e Veriut ka qenë furnizuesja më e madhe me trupa për Rusinë, duke dërguar, sipas raportimeve, 11.000 ushtarë vitin e kaluar me qëllim që të zmbrapseshin ushtarët ukrainas nga rajoni rus i Kurskut.