Lufta në Ukrainë vijon prej më shumë se 1300 ditësh. Për Putinin konflikti i armatosur nuk do të kishte nisur nëse do të ishte presidenti amerikan Donald Trump. Por pavarësisht se ai tashmë është kthyer në krye të Shtëpisë së Bardhë, Putin shtoi se kundërshtarët ndaj Rusisë janë shtuar. "Të gjitha vendet e NATO-s janë në luftë me Rusinë dhe nuk po e fshehin këtë", tha presidenti rus, raporton Tgcom. Presidenti tha gjithashtu se Rusia do të reagojë shpejt nëse Evropa provokon Moskën për armatosjen e Ukrainës, të cilën kreu i Kremlinit e konsideroi si “militarizim histerik të kontinentit”. Qëndrimi i tij vjen pas deklaratave të bëra nga kryeministri hungarez Viktor Orban në ditën e dytë të samitit të Komunitetit Politik Evropian që u mbajt në Kopenhagen. "Ata duan të kanalizojnë fondet e BE-së në Ukrainë. Ata duan të përshpejtojnë pranimin e Ukrainës me të gjitha llojet e trukeve ligjore. Ata duan të financojnë dërgesat e armëve. Të gjitha propozimet tregojnë se Brukseli dëshiron të shkojë në luftë", tha ai duke mos fshehur edhe njëherë qëndrimin pro rus. Por nga ana tjetër Macron përsëriti për Moskën mesazhin se po shkel hapur hapësirën ajrore të aleancës duke rritur kërcënimin.