Vladimir Putin ka "frikë të përdorë armë bërthamore", sepse ai e do jetën e tij dhe kontrollon jetët e të tjerëve, tha Volodymyr Zelenski. Presidenti rus tha pak ditë më parë se ai po ndryshonte "doktrinën bërthamore" të Rusisë, duke zgjeruar ndoshta rrethanat në të cilat mund të përdoren armë të tilla shkatërruese. Por Zelensky tha se ai nuk mendon se Putini do të rrezikonte përdorimin e armëve bërthamore, në një intervistë për Fox Neës. Udhëheqësi ukrainas tha: "Askush nuk e di se çfarë ka në kokën e tij Putini. Ai mund të përdorë armë bërthamore në çdo vend dhe në çdo kohë. Por unë nuk mendoj se do ta bëjë këtë...Ai e do jetën e tij dhe do të kontrollojë jetët e të tjerëve, ndaj mendoj se ai duhet të ketë frikë të përdorë armë bërthamore". Që nga fillimi i luftës në shkallë të gjerë Rusi-Ukrainë, Kremlini ka kërcënuar vazhdimisht me rrezikun e luftës bërthamore. Të shtunën, ministri i Jashtëm rus Sergej Lavrov i tha Uashingtonit që të përgatiste Evropën për një "sipërmarrje vetëvrasëse" për shkak të "rrezikut të përballjes me një fuqi bërthamore si Rusia". Kur Putin shpalli ndryshimin e doktrinës së tij bërthamore në Këshillin e Sigurimit të Rusisë javën e kaluar, ai tha se propozonte që "të konsiderohej agresioni kundër Rusisë nga çdo shtet jobërthamor, por me pjesëmarrjen ose mbështetjen e një shteti bërthamor, si sulm i përbashkët ndaj Rusisë”. Ndërsa ai nuk përmendi asnjë shtet, kuptohet lehtësisht se i referohet Ukrainës, një shtet jobërthamor që merr mbështetje nga SHBA dhe fuqi të tjera bërthamore. Putin tha gjithashtu se Moska do të konsideronte përdorimin e armëve bërthamore nëse do të ketë një lëshim raketash, avionësh apo dronësh kundër saj. Ukraina ka kërkuar që SHBA dhe Britania ta lejojnë atë të përdorë rraketat me rreze të gjatë veprimi thellë brenda rusisë. Por një gjë e tillë shihet me shqetësim nga perëndimi për shkak të rrezikut të përshkallëzimit që mbart.